Mat 19 | ASO | STEP | Ido' Izesu' aza gamazi muki' mene lo-ngemo osu' lo nGalilaia misubo hulo vo Zudaia misubouko Zodani noso helala vine'.

Matthew 19

Izesu' Vene' Vemoho' Izo Hukaa' Nemu' Gamazi Lo-ngimine'

(Maleko' 10:1-12)

1 Ido' Izesu' aza gamazi muki' mene lo-ngemo osu' lo nGalilaia misubo hulo vo Zudaia misubouko Zodani noso helala vine'. 2 A'mingu' novivo evene' muki' e'meti nivavo engikuti' inite' gizi dave nene do lamine' o-ngede'mo vine'.

3 Halisaio' mono' laa' ave linge ma ingine Izesuda igi emengu' mili ti' li longo' i-dani': Gaza Zuda veti lou' gamazitemu' gelanivo ele'ningine inite' ngomo' nabakumu' ngimisele hulaa' nene lisihe' o neihe lisihe' amive. 4 Ti' li longo' i-dikevo ti' lo lo-ngimine': Mono' godolou' gamazi ma ti' lo minine' nene lingine mo gati gili nizani' ma nene gilamani' nehe: Gomu' inite' muki' do soto' molaa' ive'mo vegi veneki lolo' o-ngidine' ve. 5 Ne'mine ogo ti' lo line': Nemu' nene ve nene izelehingi melehingi hulo elenahida bizo minavo ingine hamo' lolo' asine' gelavo minilisasive. Nemu' nene ingine nene sita' nizasive ma lo-ngedamolosune. Mo hamo' nene nizasive. 6 Nemu' nene O'moso'mo inite' do hamo' ogo molo neinguti' ve malike do ize' molaa' nene nomive. 7 Lavo ingine ti' li lani': Ido' ne'mine lo ma Mose' aza gamazi ne'mine lo line' nene nanitekumu' line' neve: Ve mali'mo elenahine hulo-delove lo ma vene' mene mo hulo-dekuve lo luhuvo gize emosa hulo-davo vilive. 8 Ne'mine likevo aza ti' lo line': Lingine gamazi gilami peleseve' izaa' angumu' nene Mose' vene' ngimisele hulaakumu' gele lengemave. Ne'mine ine'za O'moso'mo vene' vemoho' do soto' ogo do bize-ngidine' gamenelati' nene ele'ningine hulo-ngedaa' monovo nomine' ve. 9 Ido' naza ne'mine lo nolo-lingimuve: Ve ma elenaho aza ve gohi masi monamivo inite' atokumu' hulo-do vene' gohi ma daline' nene O'moso'mi lou' gamazi avuto' ogo lihime naba daloseive.

10 Ne'mine lavo izipahala zuho ingine ti' li li-imani': Vesi venekisi bizo nonivo inite' ne'mine mana'mine ilizangumu' huli-ngidamilizave lainako vene' damo ha minaa' nene lamine' neive. 11 Ne'mine likevo Izesu' ti' lo line': Mene gamazi nene evene' mukilite gili dalizado' nomive. Evene' linge ma O'moso'mo lu'ine ga'ine hize ele' o-ngedavo engikovo' dalisave. 12 Ido' linge ma a'mine gamazi gili dalizave noluvoni' nene nemu' nene noluve: Evene' linge ma ize'ningi mulu'ninguti' gizeho'ine nevo'mine nomine' soto' ani' ne'mo vene' damaa' ani' ve. Ido' ve ma nene evenelite gizeho'ine ili huli-ngidikevo vene' dami minaa' nave. Ido' linge ma nene O'moso'mo gizebo ingu' gono neine' nemu' lu'ine milalisa vene' daa' nene angise'ine o'ove li haza minaa' nave. Ve ma ingine vene' damaa' amuzo engita mineline' nete nene gamazi mene gili dalisave.

Izesu' Izipe nGomo nGomo No'noho' Ize-ngidine' Gamazi

(Maleko' 10:13-16; Luka' 18:15-17)

13 Neloti' nene evene' ingine izipe ngomo ngomo nene Izesu' ana godo'nido' hito O'mosola lo no'noho' ize-ngedelive li ngele'mizi neida navo izipahala zuho ingine ngelemi o've li-ngidani'za 14 Izesu' aza ti' lo line': Izipe ngomo ngomo me'mine minave nene O'moso'mo gizebo o neingu' ngele'mize molaa' neinako huli-ngimikavo nenita ha alizaze. O'ove li-ngidamilo. 15 Ne'mine lo ana godo'nido' hito mino no'noho' ize-ngedosa vo mala vine'.

Izesu' Heneni Vemu' Line' Gamazi

(Maleko' 10:17-31; Luka' 18:18-30)

16 Ido' novivo ve ma aza Izesu' neida ogo ti' lo longo' o-do line': Tisazo, naza inite' lamine' nani'mine olodi'mo nene minevo' minevo' nemeni dameni daloni' o neive. 17 Ne'mine lo longo' o-do line'za Izesu' aza ti' lo lo-imine': Monovo lamineli'mi Meleho nene hamokovo' neine' nenako neni' nene monovo lamine' ogakumu' nene nanitekumu' longo' o-nedane. Minevo' minevo' gemeni dameni nene dalove lo ma aka gamazi e'metaa' olosane. 18 Ne'mine lavo aza ti' lo line': Aka gamaziuti' nene ado' za' ma e'metelongumu' nolane. Ne'mine lavo Izesu' ti' lo line': Lingine evene' ngibili hilamilo. Ido' vene' vemoho' lili' ikeni' nete lingine bizivo' mini vene' nehe vemoho' nehe gohi masi gopo ingamilo. Ido' gumine amilo. Ido' evene' mamu' gopo' napa gamazi li-ngidi sakupo gamazi li-ngidamilo. 19 Ido' izetingine metinginemu' gilikevo dizavo gelekele' i-ngidi minilo. Ido' lingine lengikumu' gilaa' nani' ne'mini avito' gidini ingi monavemukisi nene a'mine'mine igi gilii lutine ngimilo. 20 Ne'mine lavo ve goso've aza ti' lo lo-imine': A'mine gamazi muki' nene mo e'metaa' nouvoni'za olihe vo damivosa nanite' gohi ma e'meteloni' neve. 21 Ne'mine lavo Izesu' ti' lo lo-imine': Gaza mo evene' lisihe' lamine' gehepeve minelo ma nene vo henenika inite' mataka maketi molo moni daline' nene ize' molo goho' gahali' ize' molo ngemezo. Ne'mine iline' ne'mo Okulumokuko henenika ma mineleseive. Ido' ne'mine ogo ogo ne'metezo. 22 Ne'mine lavo goso've aza heneni've vai' goloso mininako a'minemu' gilivo geni belavo muhele' ogo vo ha ha ine'.

23 Ne'mine ogavo Izesu' aza izipahala zuho ti' lo lo-ngimine': Heneni ve minanguti' linge ma Okulumoku' minive'mo gizebo ingu' vi hilalizani' nene ge'nebe igisavo' a'mingu' vi hilalisave. 24 Ido' gohi nolo-lingimuve: Kamela' ize nene naba neine' nenako nemu' nene inite' ongotilisa nakeseu' nala' loloso' iga' ani' veleu' nene ma volosa iline' nene ge'nebe goloso oloseine'za heneni ve nete a'mine nene ivile' ivosa O'moso'mo gizebo o neine' ebeku' vilisa ge'nebe goloso ilisave. 25 Ne'mine lavo izipahala zuho ingine upuho' goloso igi vo'ine gohi vavo ti' li lani': Laza nene O'moso'mo umo hilive nene heneni ve lolo' o-ngedaa' neihe lo gilune'za gaza heneni ve netesi O'moso'mo gizebo o neine' ebeku' mo vi hilamilisave lo lainako nemu' nene O'moso'mo evene' hamokisi mo ma do lu' izamivo eze gizebo ingu' vo holamolobe lo nogilune. 26 Ne'mine likevo Izesu' aza vonu' ngebelo ti' lo lo-ngimine': Evene' angise'nidati' lukuvo ngeli ma namilisaha O'moso nene inite' muki' oga' amuzo do neine' nenako nemu' evene' do ngu' izelido' lisihe' o neive.

27 Ne'mine lavo Petolo' ti' lo line': Gaza gelezo. Laza neve inite' matate muki' nene hulo osu' lo noge'metuniko ne'mine nounido' nene nanite' dalone. 28 Ne'mine lavo Izesu' aza ti' lo lo-ngimine': Lamine' ma lo-lengemelove: Alinge' O'moso'mo inite' mata' muki' do gosoho' ogavo O'mosolati' ve gihile naza labana'ne do soto' ogo Guve'nesi ve naba mineloni' mo'mosi'nelo' mino evene'ne zuho gizebo o-ngedo nouvo neze ne'metaa' ave linginesi guvetinesi ve lolo' igi guve'inesi ve minaa' ani' mo'mosi' tuvelu nelo' mini Isilaele' aleveti mulise tuvelu nene gizebo i-ngidi minilisave. 29 Ido' evene' ma ingine neni' ne'metilisa numu'ine ebe'ine nehe uvo'ningine naku'ningine nehe ate'ningine aluno'ningine nehe ize'ningine me'ningine he izipaha'ine nehe ido' misubo'ine nehe muki' huli ne'metave nene O'moso'mo gohi a'mido' imine' molo ngemavo muki' goloso dalisave. Ido' O'moso'mo gohi minevo' minevo' ngemeni dameni nesi ngemavo dalisave. 30 Ne'mino neine'za dizi nilizani' aleveuti' linge muki' nene limi minilisave. Ido' limi nilizani' aleve nene dizi minilisave.